За денеска, четврток, во 11 часот, во Собранието е закажана првата седница на Комисијата за оценување на основаноста на предлогот за покренување постапка за утврдување одговорност или импичмент на претседателот Ѓорѓе Иванов.
Комисијата има 11 члена од кои шестмина пратеници се на ВМРО-ДПМНЕ. Според пратениците ова ќе биде уште една деловничка фарса на власта во која со надгласување ќе се блокира уште една комисиска расправа.
На собраниска седница за формирање на Комисијата, пратениците на СДСМ не гласаа за нејзинот формирање, затоа што сметаат дека застапеноста на пратениците во комисијата не е соодветна. Тие ја обжалија и до Управниот суд.
Не се знае дали денеска на комисиската седница и ќе присуствуваат двајцата членови од СДСМ. Според нив, основањето на комисијата било сторено со грубо кршење на деловникот. Речиси е извесно, и власта тоа не го крие, дека преку оваа комисија ќе се блокира дебатата за импичмент за претседателот Иванов, и јавноста ќе биде ускратена за јавна седница на која ќе се кажат и слушнат ставовите на целата парламентарна опозиција и власта во врска со одлуката на Иванов за аболиција на 56 политичари и нивни соработници, која подоцна ја укина за 22 политичари, со можност другите сами, поединечно да побараат укинување на нивната аболиција.