Откако се разведе од најбогатиот човек во светот, Мекензи Безос стана дел од друштвото на најбогати жени во светот. Покрај неа се наоѓаат уште неколку успешни жени, кои го стекнаа нивното богатство на малку поразличен начин.
Кога најбогатиот човек на светот и неговата сопруга ќе решат да се разведат, бројките се секогаш огромни. Така беше случајот и минатата недела, кога Џеф Безос и неговата поранешна сопруга Мекензи решија да се спогодат околу условите за развод.
Според спогодбата, Мекензи (екс) Безос ќе задржи 4% од акциите во најголемата компанија за онлајн трговија, Amazon. Нејзиниот дел вреди околу 35,6 милијарди долари, а таа преку ноќ стана третата најбогата жена во светот и дваесет и четврти најбогат човек на светот. А кои жени се на врвот на листата на најбогати во светот?
1 – Франсоаз Бетенкур Мејерс
Вредност: 49,3 милијарди долари
Која е таа: Француска наследничка на компанијата L'Oréal, која заедно со нејзиното семејство поседува 33% од оваа компанија. Покрај тоа, Франсоаз е и авторка на неколку книги за грчки богови и еврејско-христијански односи.
2 – Алис Волтон
Вредност: 44,4 милијарди долари
Која е таа: Алис има 69 години и е ќерка на Сем Волтон – основачот на американскиот ланец на супермаркети наречен Walmart. Таа, за разлика од нејзините браќа, се оддалечи од компанијата и почна да се занимава со уметност.
3 – Мекензи Безос
Вредност: 35,6 милијарди долари
Која е таа: Таа е родена во Калифорнија, има 48 години и само што стави крај на 26-годишниот брак со Џеф Безос, основачот на Amazon. Има објавено неколку книги кои наидоа на одлични критики, а ја основа и добротворната организација Bystander Revolution.
4 – Жаклин Марс
Вредност: 23,9 милијарди долари
Која е таа: Жаклин има 79 години и поседува една третина од компанијата Mars, која е најголемиот светски производител на слатки. Луѓето кои добро ја познаваат ја опишуваат како филантроп, а таа меѓу другото е и член на Националната архива на САД.
5 – Јанг Хуијан
Вредност: 22,1 милијарди долари
Која е таа: Оваа 37-годишна Кинезинка поседува 57% од компанијата Country Garden Holdings, која „процвета“ во бранот на експанзија на кинеските градежни компании. Јанг има дипломирано на универзитетот во Охајо, а поголемиот дел од нејзиното богатство го должи на компанијата, која ја наследи од татко ѝ.