После секојдневното бомбардирање со вести за штетноста на килограмите и потребата од диетален живот, еве една вест која ќе ги охрабри „елегантно пополнетите“.
Конечно, добри вести и за луѓето кои имаат по некое килце плус на себе. Најновото истражување покажува дека неколкуте килограми вишок на вашето тело можат да ви обезбедат подолг живот.
Дебелите луѓе во 40-те години живеат подолго од витките луѓе, велат резултатите на истражувањето спроведено од јапонското министерство за здравство. Бројките тврдат дека витките луѓе просечно живеат шест до седум години пократко од полничките. Ова неверојатно (или чудно) откритие би можело да претставува аларм за сите кои се константно на диети и внимаваат на секој грам кој го внесуваат во организмот.
За време на 12-годишното истражување научниците набљудувале 50.000 жители на јапонската префектура Мијаги на возраст од 40 или повеќе години. Проучувана е нивната психофизичка состојба пред и по 40-тата година. Испитаниците биле поделени на групи според бројот на килограми. Крајните резултати велат дека дебелите мажи и жени живеат подолго.
Научниците како едно од можните објаснувања го даваат податокот дека послабите луѓе почесто пушат и се разболуваат од заразни болести. Воедно и предупредуваат дека новите сознанија не се повик за луѓето масовно да почнат да се дебелеат.
