Доколку и вие сте од оние кои не можат да одолеат на газираните пијалоци, имајте во предвид дека вашето здравје го изложувате на сериозен ризик. Само две чаши газиран пијалок неделно (значи, не дневно!) ви носат 87% зголемена опасност од рак на панкреасот.
Овој податок се базира на резултатите од истражувањето кое траело 14 години и кое било спроведено меѓу повеќе од 60.000 луѓе од Сингапур. Научниците од Универзитетот во Минеста кои ја спрoвеле студијата, дошле до заклучок дека луѓето кои конзумираат два или повеќе газирани пијалоци во текот на една седмица имаат 87% проценти поголема шанса да добијат рак на панкреасот од оние кои не пијат вакви пијалоци. Поврзаност помеѓу конзумирањето на зашеќерени овошни сокови и рак, не е откриена. Целокупните резултати од ова истражување се објавени во списанието Cancer Epidemiology, Biomarkers and Prevention.
Но, научниците кои дојдоа до ова откритие не се сигурни дали самите газирани пијалоци го предизвикуваат ракот, или пак луѓето кои ги конзумират имаат поголема склоност кон нездрави животни навики, а со тоа и зголемен ризик од канцер. Сепак, некои претходни студии имаат докажано дека конзумирањето на газирани пијалоци нагло го зголемува нивото на шеќер во крвта што претставува голем стрес за панкреасот.
Инаку, ракот на панкреас е еден од најчестите видови на канцер, а воедно е и меѓу најсмртоносните.
И. Е. | Кајгана
