Кога пациентот кој е болен ги прочита сите нуспојави на упатството за употреба на лекот кој го зема, голема е веројатноста дека веднаш ќе ги почувствува тие појави, тврдат швајцарските научници.
Испитаниците кои после читање на упатството за употреба добиле лажни таблети, се пожалиле на идентични нуспојави (на пример губење на желба за секс) исто како и оние кои ги добиле вистинските лекови.
За време на испитувањето, докторите на своите пациенти им давале лажни таблети убедувајќи ги дека тие ги пијат вистинските апчиња. Откако се сумирале резултатите, докторите дошле до неверојатен заклучок дека 40 % од испитаниците "оздравеле", иако не добиле вистински медикаменти. Иако веќе сигурно знаете дека тука станува збор за плацебо ефект, сигурно не сте знаеле дека постои и обратна верзија, наречена ноцебо ефект.
Ноцебо ефектот е откриен уште пред десет години во истражување кое покажало како жените кои веруваат дека ќе заболат од срцеви болести четири пати почесто умираат од истите, како и дека пациентите кои не веруваат дека ќе преживеат операција, двојно почесто не се будат после анестезија.
Швајцарските научници во своето истражување наведоа и пример кој докажува дека моќта на сугестијата дури може да предизвика и епидемија. Имено, во 1988 година во едно американско училиште, на професорот му се причинило дека осетил мирис на бензин и почнал да се жали на главоболка, мачнини, тешко дишење и вртоглавица. Во следните 7 дена повеќе од 100 ученици и наставници се пожалиле на истите симптоми, иако не постоела никаква причина за таква состојба.
Исто како што позитивното размислување може да биде корисно за здравјето, така и негативните мисли може да го нарушат - заклучуваат швајцарските научници.
