Негативното размислување нема да ви помогне многу во борбата со килограмите во пресрет на летниот период кога и вие сакате да излезете на плажа без да се мислите дали некој ќе ги повика Гринпис додека лежите „насукани“ помеѓу песокот и водата.
Доколку постојано во себе си ги повторувате фразите како „не можам да ослабам“, „не можам да го јадам тоа“ или „не можам повеќе да издржам“, не е ни чудо што ќе престанете со диетата, вежбањето или здравиот начин на исхрана пред да ги почувствувате првичните резултати од напорот.
Заменете го „лажев“ со „одбрав“
Доколку се опишувате како лажго/а затоа што сте изеле нешто благо во 19:30, ќе се чувствувате уште полошо. Тогаш имате чувство дека диетата е неодржлива, тешка, а подоцна и ќе потклекнете потполно. Наместо да мислите дека сте се измамиле самите себе, подобро прифатете дека сте одбрале да го изедете колачето после дозволеното време. Таквото размислување ви ја враќа моќта која ја имаат луѓето кои сами одлучуваат за себе.
„Не можам да ослабам“ заменете го со „не можам да ослабам три килограми“
Ова е важно затоа што првата изјава едноставно не е точна. Речиси сите луѓе можат да ослабат, и размислувањето дека баш вие не можете ментално ќе ве блокира и навистина ќе ве спречи да изгубите по некој килограм. Поставете си реални цели кои можете да ги реализирате, дури и ако се работи за само еден килограм. Откако ќе ја постигнете таа цел, ќе започнете да верувате во себе и ќе можете да направите уште поголеми подвизи.
Наместо да мислите дека сте лоши, бидете горди на себе
Карактеризирајќи се себеси како непослушна личност си давате дополнителен простор за таквото однесување. Па така, наместо едното изедено колаче вон предвидениот термин, ќе помислите дека ионака не можете да издржите па ќе „смачкате“ уште едно. Или пет. Бидете горди бидејќи во текот на денот сте се придржувале до принципите на здравата исхрана, и одлучете дека утре ќе се обидете да издржите цел еден ден. Впрочем, не сте се откажале потполно, а едно мало отстапување и не е ништо страшно.
Наместо „не можам да го јадам тоа“, кажете „да, можам“
Фокусирајте се на сета вкусна храна која можете да ја јадете додека сте на диета и јадете здраво. Додека внимавате на големината на порциите, речиси ништо не е забрането. Запомнете, доколку „на сила“ се обидувате да ја избегнете омилената храна, уште повеќе ќе ја посакувате. Мини порциите ќе ви ја задоволат желбата, а нема да влијаат на вашата линија.
