Зимскиот распуст за учениците ќе биде продолжен за пет дена, односно наместо до 18 јануари распустот е продолжен до 23 јануари, одлучи Комисијата за заразни болести.
Ваквата одлука е прифатена и е донесена поради намалениот број лица заболени од грип на училишна возраст, а со цел да се намали бројката на заболени од ноќеска ќе се врши дезинфекција на јавните автобуси.
Министерот за здравство Никола Тодоров во изјава за медиумите објави дека е донесена мерка за продолжување на зимскиот распуст на учениците до 23 јануари.
Појасни дека одлуката е донесена како резултат на намалувањето на бројот на заболени од грип во периодот додека децата биле на распуст.
„Наместо на 18 јануари, второто полугодие да започне на 23 јануари. Оваа мерка е потребна со тенденција на намалување на заболените од грип на возраст од 0 до 14 години. Покрај оваа мерка, ќе се спроведе темелна дезинфекција на автобусите на Јавното сообраќајно претпријатие во Скопје и другите градски автобуси, како и во останатите градови каде што има организиран сообраќај. Засилената мерка, исто така, предвидува темелна дезинфекција на сите училишта пред почетокот на училишната година“, прецизираше Тодоров.
