Златната крв е толку ретка што би можеле да ја платите со злато. Секој може да ја прими при трансфузија, а може да биде проклетство за носителот.
Крвта сама по себе е течност вредна злато, бидејќи ни значи живот. Но, „златната“ крв е толку ретка што се смета за највредна. Според досега познатите податоци, ја имаат помалку од 50 луѓе во светот, пишува сајтот bigthink.com.
Златната крв се нарекува и Rh-null или Rh нула, што значи дека крвта го нема Rh факторот, една од нејзините суштински карактеристики (веднаш по крвните групи AB0), што е многу важно за време на трансфузијата, како и за време на бременоста.
Нема да навлегуваме во детали, бидејќи објаснувањето е предолго и доста комплицирано, па накратко: резус или Rh фактор е ознака за одредени видови протеини на површината на еритроцитите, црвените крвни зрнца, кои можат да предизвикаат имунолошка реакција при трансфузија или за време на бременост, ако крвта на донаторот или крвта на мајката и фетусот се разликуваат во овој фактор.
Името го добило по типот на мајмун кај кој првпат биле откриени овие протеини. Системот на крвната група Rh главно препознава две групи: позитивни (Rh+) и негативни (Rh-), а од 1961 година, Rh-null или Rh нулта група без резус фактор. Тогаш за прв пат беше откриена крв со нулта Rh кај австралиски Абориџини.
Иако се нарекува златна, на некој начин е и проклетство за оние кои ја имаат. Лицето со оваа крвна група не може да прима крв освен „златна“. Од друга страна, секој може да ја прими неговата крв. Во 2022 година, во светот имало девет активни дарители на златна крв, според веб-страницата medicalnet.com.
Затоа, бидејќи залихите со златна крв се толку ретки, сопствениците се советуваат и се охрабруваат да складираат сопствена крв за секој случај. Меѓутоа, бидејќи крвта не трае долго дури и ако е замрзната, и бидејќи не е возможно во секое време да се земе на залихи поради регенерација на крвта во телото, таквата акумулација може да биде голем товар за сопственикот на златна крв.
Луѓето со Rh нула или златна крвна група исто така може да имаат одредени проблеми.
Бидејќи нивните црвени крвни зрнца немаат протеини на површината кои го одредуваат Rh факторот, нивните еритроцити се со различна форма, помалку еластични и покревки. Поради ова, луѓето со златна крв се соочуваат со умерена хемолитична анемија од раѓање. Ова е анемија која произлегува од побрзо уништување на црвените крвни зрнца, што може да предизвика ниско ниво на хемоглобин, бледило и замор.
Со трансфузија, може да настанат сериозни проблеми ако на лице со златна крв му се даде крв што има Rh фактор. Затоа болниците мора да имаат посебни протоколи и брз одговор за овие типови пациенти.
Слични проблеми може да се појават и за време на бременоста ако мајката има златна крв, а детето нема. Ако крвта на мајката е чувствителна на крвта на бебето, може да предизвика имунолошки одговор кој може да предизвика спонтан абортус, а исто така може да влијае на можноста за повторно зачнување.
Неколку студии исто така покажаа дека инфекцијата или сепсата кај таквите луѓе може да предизвика екстензивна хемолиза (распаѓање на црвените крвни зрнца), што резултира со откажување на бубрезите и други компликации, пишува MedicineNet.
