Постојат многу различни начини како да го искористите одморот: патување со друштво, со партнерот, со семејството, со еден или со повеќе луѓе... или пак - сами.
Според најновите истражувања, сѐ повеќе луѓе избираат да патуваат сами, а причината за тоа е слободата и потребата за предизвик.
Британската истражувачка компанија YouGov и онлајн службата за букирање Agoda спроведоа истражување за патувања, поточно за туристите кои се одлучиле сами да патуваат до некоја позната дестинација.
За да дојдат до одговор на прашањето кои дестинации се најдобри за луѓе кои патуваат сами, но и да дознаат кои се причините за таквата одлука, тие ги споредиле податоците од корисници од Азија, Северна и Јужна Америка, Европа и од Австралија.
Резултатите покажале дека релаксацијата е главниот мотив за соло патниците, а потоа следат желбата да излезат од рутина и истражувањето нови култури.
Кога станува збор за патниците од Азија, најчеста дестинација за соло патување им бил Бангкок, а меѓу популарните дестинации се Куала Лумпур, Токио, Сингапур, Хонгконг, Хо Ши Мин и Манила.
Американците, Европејците и Австралијците најчесто патуваат во Лондон, Токио, Сиднеј, Мелбурн, Њујорк, Бангкок, Лос Анџелес и Лас Вегас.
Интересно е што Токио е подеднакво популарен град за соло патниците од сите континенти. Сите спомнати дестинации се метрополи што нудат голем избор кога се во прашање атракции, ноќен живот, шопинг и добра храна.
Истражувањето исто така воочи разлика во возраста меѓу соло туристите според местото од каде доаѓаат. Патниците од Азија обично се млади од 18 до 26 години, а од Европа и од Америка се главно луѓе над 39 години.
