Белградскиот аеродром „Никола Тесла“ во 2017 година беше убедлив лидер во регионот по број на патници, а со рекордна година може да се пофали и аеродромот „Фрањо Туѓман“ во Загреб.
Во изминатава година имаше зголемување на бројот на авионски летови во регионот и проширување на капацитетите на аеродромите, а на листата 10 најпрометни, само два не успеаја да ја достигнат „магичната бројка“ од над 1 милион услужени патници: аеродромите во Подгорица и Сараево.
Сепак, со 957.971 патник во 2017 година, Меѓународниот аеродром Сараево имаше најуспешна година во својата историја. Шест нови авиокомпании почнаа да летаат од Сараево минатата година, а во план е и значително проширување на аеродромските капацитети, пред сѐ изградба на модерен терминал и придружни згради.
Скопскиот аеродром „Александар Велики“ во изминативе години имаше најјака стапка на раст во регионот. Доброто работење на главниот аеродром кај нас продолжи и во 2017 година. Скопскиот и охридскиот аеродром заедно услужија 2.027.344 патници во 2017 година, што е за 13% повеќе отколку во 2016 година.
Топ 10 најпрометни аеродроми во регионот по број на патници за 2017 година се:
1. Белград 5,34 милиони патници
2. Загреб 3,09 милиони патници
3. Сплит 2,82 милиони патници
4. Дубровник 2,32 милиони патници
5. Скопје и Охрид 2,03 милиони патници
6. Приштина 1,89 милиони патници
7. Љубљана 1,68 милиони патници
8. Тиват 1,11 милиони патници
9. Подгорица 986.717 патници
10. Сараево 957.971 патник.