Германски суд денеска осуди 101-годишник на пет години затвор за помагање и поттикнување на убиството на илјадници затвореници во нацистичкиот концентрационен логор Заксенхаузен за време на Втората светска војна.
За време на судењето во Бранденбург, западно од Берлин, обвинетиот негираше дека бил чувар во логорот.
Обвинителството, меѓу другите докази, приложи документи со име, датум и место на раѓање кои одговараат на обвинетиот, а припаѓаат на чувар на нацистичката паравоена организација СС (акроним од германскиот збор Schutzstaffel - заштитен одред).
Повеќе од 200.000 луѓе биле приведени во концентрациониот логор во близина на Берлин од летото 1936 година, кога бил изграден, до крајот на Втората светска војна во 1945 година.
Меѓу уапсените имало политички противници на нацистичкиот режим и членови на малцинските групи Евреи и Роми прогонувани од нацистите. Десетици илјади затвореници умреле од глад, болести, принудна работа и медицински експерименти како дел од систематскиот план за истребување.
Поради возраста, обвинетиот можел да присуствува на судењето само ограничено, односно приближно два и пол часа секој ден.
