11 август 1945, Југословенките се избориле за право на глас

На денешен ден, 11 август, во 1945 година, жените во Југославија се избориле за право на глас.

Правото на глас за жените било потврдено уште во 1941 година во документите на Врховниот штаб на народноослободителните партизански одреди на Југославија, кој во тоа време имал контрола над териториите ослободени од нацистичката окупација.

Тоа право прв пат било искористено по Втората светска војна, на изборите за Уставотворното собрание во ноември 1945 година. Во тоа време, сите мажи и жени над 18-годишна возраст во земјата гласале за Уставотворното собрание.

По овие избори, првите на кои југословенските жени имале право на глас, на 29 ноември 1945 година, монархијата била укината и била прогласена Федеративна Народна Република Југославија.

Во истата година, жените во Франција и Италија се избориле за право на глас. Жените во Швајцарија со тоа право се стекнале во 1971, а во Лихтенштајн дури во 1984 година. Прва земја во светот во која жените оствариле право на глас е Нов Зеланд, каде жените гласале уште во 1893 година.

Југославија во војната изгубила 1.700.000 жители од кои 600.000 жени, Во Народно ослободителната војска се бореле 110.000 жени а загинале 25.000, 40.000 ранети и 3.000 неспособни за работа, 2.000 станале официри, Партизанска споменица 1941 година добиле 3.344, а народни херои на Југославија - 91 жена.

Илустрации: Зоран Кардула