Пролетното издание на Моден викенд Скопје заврши вчеравечер со четири ревии, секоја со различен сензибилитет и естетика, заокружувајќи ја јубилејната 15 сезона.
Настанот, што оваа сезона опфати 13 модни ревии, се одржа во „Порше Македонија“, обединувајќи ги на едно место дизајнерите, модните новинари, блогери и вљубениците во модата.
Последната вечер од тридевниот моден настан за сезоната пролет-лето 2017 година, ја отвори „Walone fashion group“ со колекцијата „Plumes et Perles“ инспирирана од убавината на пердувите и бисерите дополнета со рачно изработени детали. Станува збор за екстравагантни креации во розеви, бели и златни нијанси.
Несекојдневната ревија за чевли и чанти од „Paolo Bocelli“ презентираше модели со динамичен стил и дизајн според последните модни тенденции. Ревијата беше вистинско освежување во поглед на ревиското претставување на модни додатоци, со креативно „облекување“ на моделите во хартиени креации, цвеќе и светки на рацете и уникатен пристап кон акцентирање на моделите.
Можеби најпролетната колекција сезонава ја прикажа Сара Реџиќ која прв пат се претставува на Моден викенд Скопје. Колекцијата „Spring fairy“ беше модна приказна што буквално расцвета на пистата, со раскошни фустани и мантили со цветни мотиви, како и плетива и оригинални везови како детали. Реџиќ се најави на модната сцена како дизајнерка со женствен и романтичен сензибилитет чии креации носат длабок традиционален идентитет во современа и нослива форма.
За крај на петнаесеттиот Моден викенд Скопје на групна ги видовме тројцата избрани финалисти од неодамнешниот натпревар „Fashion Scout SEE“: „Victor Kaiser“ со модни парчиња кои се трансформираат, „Shaleva Couture“ со колекцијата „Alice“ за есен-зима 2017/2018 и „Ана Марија“ со колекцијата 1WOMAN – “Throw me to the wolves and I will return leading the pack.” Станува збор за капсулни колекции кои на 28 март годинава беа презентирани на модната недела во Белград, заедно со финалистите од Србија, Словенија и Хрватска.
Тројцата финалисти прикажаа капсулни колекции што ги идентификуваа како автентични автори за кои допрва ќе се слуша, благодарение на беспрекорната изработка, визионерската креативност и вниманието посветено на деталите. Нивната ревија беше одличен начин да се заокружи јубилејното издание, како ветување за една светла и бестрашна идина за македонската мода.
Со јубилејното издание, Моден викенд Скопје ја зацврсти позицијата на единствен континуиран настан кај нас што нуди платформа како за младите, така и за етаблираните модни дизајнери и брендови, преку која се презентира нивната работа, се поттикнува и поддржува македонската модна сцена од сезона во сезона и се продлабочуваат врските меѓу сите играчи во модната индустрија.
