21 мај 1927, првиот непрекинат лет Њујорк-Париз

На денешен ден, 21 мај, во 1927 година, американскиот авијатичар Чарлс Линдберг станал првиот човек кој успеал со непрекинат лет да прелета од Њујорк до Париз.

Францускиот хотелиер Ремон Ортеиг, кој живеел и работел во Њујорк, објавил конкурс за награда од 25.000 долари (369.000 во денешна вредност) за оној ќе успее да прелета од Њујорк до Париз без да застане.

По неколку неуспешни обиди во кои животот го загубиле петмина пилоти, конечно тоа му успеало на Чарлс Линдберг. Утрото на 20 мај Линдберг полетал со својот авион наречен „Spirit of St. Louis“ изработен од Ryan Airlines специјално за подвигот.

Полн со 1.704 литри гориво, авионот тежел 2.329 килограми, поминал 5.850 километри за 33 часа и 29 минути. Утрината на 21 мај слетал на Ле Бурже аеродромот во близина на Париз каде огромна толпа од 150 илјади навивачи го пречекале, го извадиле од авионот и половина час го носеле на раце.