22 јуни 1941, Хитлер ја почнал инвазијата на СССР
На денешен ден над 3 милиони германски војници навлегле на територијата на СССР од три страни, отпочнувајќи ја најголемата и најмоќната воена инвазија во историјата.
Вкупно 19 панцер дивизии, 3.000 тенкови, 2.500 авиони и 7.000 парчиња артилерија згрмеле на 1.500 километри долгиот фронт, со што всушност Адолф Хитлер отворил нов фронт во Втората светска војна.
И покрај фактот што Германија и СССР имале потпишано Пакт во 1939 година, кој гарантирал одреден регион на влијание на секоја страна без мешање на другата, и двете страни се сомневале дека истиот ќе биде почитуван.
Бадијала биле советите од нацистичките генерали до Хитлер да не отвора втор фронт и да ја повтори грешката од Првата светска војна, бидејќи не верувале дека Германија има сили да се бори на два фронта истовремено. Но, Хитлер бил убеден дека инвазијата врз Англија не успевала бидејќи Англичаните имале склучено таен договор со Советите и добивале помош оттаму, па стравувајќи дека ќе биде притиснат од две страни донел одлука за Директива бр. 21 под името Операција Барбароса, во декември 1940 година, чиј план го кроел до тој 22 јуни 1940 кога и ја започнал операцијата.
На крајот ја доживеал истата судбина како еден друг „диктатор“ точно 129 години претходно (минус само еден ден). Хитлер, како и Наполеон, доживеал тежок пораз иако на почетокот имал значаен успех и дошол речиси до Москва. На крајот Советите му влегле дури во Берлин.