Млада жена на возраст од 28 години од Македонија е хоспитализирана, откако се вакцинирала со вакцината на AstraZeneca во Србија, изјави министерот за здравство Венко Филипче.
Тој соопшти дека девојката вчера е хоспитализирана со тромботичен ефект којшто се поврзува со примена една доза на вакцината на AstraZeneca. Претходно таа немала заболувања. Проблемите кај девојката се појавиле по шест до седум дена од нејзиното вакцинирање.
Денеска во нашата земја започна вакцинирањето со вакцината AstraZeneca, на лица постари од 77 години.
„Вакцинирањето засега тече без проблеми, а состојбата со вакцинацијата ќе мора да се следи со голема претпазливост“, истакна Филипче.
„Ќе чекаме потврда дека вакцината е безбедна. Сакаме да бидеме претпазливи, денеска имаме закажано состаноци со МАЛМЕ, а ако треба ќе се обратиме до Европската агенција за лекови. Има ситуации каде вакцината на AstraZeneca предизвикува тромботична реакција кај млади луѓе, иако се ретки, ние сакаме да бидеме претпазливи. Засега нема препораки дека нешто превентивно треба да се прави, станува збор за ретки случаи“, истакна министерот.