Работата е извор на гордост и важен дел од човечкиот идентитет.
Но, како што забележа американскиот тренер за кариера Лаура Лулие долготрајното работење може да влијае на вашето ментално здравје и на вашите односи со другите луѓе.
Затоа треба да ги забележите знаците на прекумерна работа, пред да дојде до исцрпеност. Лулие истакна три вообичаени знаци дека работата преовладува во вашиот живот и даде совети како да ја промените вашата перцепција за работата за да ја преземете контролата врз вашиот живот.
Лулие истакна дека проверувањето мејлови за работа веднаш штом ќе се разбудите и непосредно пред спиење е нездраво и може да влијае на квалитетот на вашиот сон. Таа предложи да се одвои време кога нема да ја проверувате работната е-пошта и кога нема да ги завршувате работните задачи за кои немавте време на работа.
Според неа, концептот на рамнотежа помеѓу работата и приватниот живот би можело премногу да се поедностави бидејќи работата и животот се испреплетени и нереално е да се очекува дека тие две можат целосно да се разделат. Затоа таа советува поголема флексибилност, т.е. работна организација која ќе ви овозможи да создадете рамнотежа помеѓу работата и приватниот живот.
Лулие нагласи дека мултитаскингот може да остави впечаток на продуктивност, но всушност може да биде контрапродуктивен. Таа потсети дека една од најефикасните стратегии за управување со времето е да се фокусирате на една работа, бидејќи тоа може да ве спречи да работите непотребно долги часови.
Лулие потсети и дека балансирањето помеѓу работата и приватниот живот може да биде тешко во работа која носи голема одговорност. Уште поголем проблем е кога работата ви ги преокупира мислите и доминира во приватните животни разговори.
„Можеби вашите пријатели или партнер се жалат дека само за тоа зборувате, особено за време на викендите. Тоа е дефинитивно знак дека работата преовладува и дека е време да се направи нешто во врска со тоа“, истакна Лулие.
Соодветно на тоа, таа советуваше да одвоите време да размислите за тоа што ви носи цел и радост на работното место и дека треба да закажувате дневни активности кои ве енергизираат и прават да се чувствувате добро.
Како што рече Лулие, грижата за себе и сопствената благосостојба е сосема во ред. Ова не значи дека сте неефикасни на работа или дека не се грижите за вашата кариера, пишува Business Insider.
