4 јули 1776, усвоена била Декларацијата за независност на САД

На денешен ден, 4 јули 1776 година, на континентален конгрес во Филаделфија била усвоена Декларацијата за независност на Соединетите Американски Држави.

Декларацијата за независност на САД е државотворен документ на САД со кој се прогласило дека тринаесетте американски колонии, кои во тоа време биле во војна со Велика Британија, повеќе не се дел од Британската Империја. Декларацијата требало да биде формално објаснување за причините поради кои Конгресот на 2 јули изгласал независност од Велика Британија, после повеќе од една година војување. Националниот празник на САД - Денот на независноста - се слави на 4 јули, денот кога е усвоена оваа Декларација.

Творци на документот главно се Томас Џеферсон, Бенџамин Френклин, Џон Адамс, Роберт Ливингстон и Роџер Шерман. Оригиналниот документ кој бил проследен за печатење е загубен. Документот кој денес е изложен во Националните архиви на САД во Вашингтон е напишан на рака и потпишан од повеќето делегати помеѓу 19 јули и 2 август 1776.

Декларацијата за независност и денес се смета за светилник на американската нација за вредностите кон кои треба да тежнее:

„...сите луѓе се создадени еднакви, обдарени од Создателот со одредени неотуѓиви права меѓу кои правото на живот, слобода и потрага по среќата“.