Авиопревозот веќе одамна не е луксуз.
Без разлика дали летате на кратки или долги релации, има некои мали тајни што нема да ги слушнете од екипажот на лет и нема да ги прочитате во авионската брошура, како информации за хигиената на авионот и најдоброто време за летање.
Колку често се чисти авионот?
Во нормални околности, еднаш дневно, главно доцна навечер или во текот на ноќта. На малите масички на склопување има најмногу фекални материи бидејќи патниците кои патуваат со бебиња најчето таму ги преоблекуваат и им менуваат пелени. Затоа, не е на одмет да носите влажни марамчиња за дезинфекција со себе.
Кое е најдобро време за полетување?
Кој рано рани... Најголема веројатност авионот да полета навреме е во раните утрински часови. Како што одминува денот поголема е веројатноста за доцнење, поместувања и одложувања на летовите.
Кое место во авионот е најбезбедно?
Во опашката на авионот. Освен во случај кога ќе се одвои опашката. Ама најдобро е да не мислите на најлошото.
Што јаде екипажот на лет?
Си носат своја храна бидејќи често се случува да не остане ништо од храната предвидена за патниците. А и домашната храна секако е повкусна од она што се служи во авион. Пилотот и копилотот обично не јадат од истата храна, иако нема правило за тоа. Тоа е мерка на претпазливост, во случај на едниот да му се слоши или да се затруе со храна, другиот да биде во состојба да ја преземе контролата врз авионот.
Дали маските за кислород се од некаква помош?
Маските за кислород ќе ве обезбедат околу 15 минути. Иако тоа звучи како кратко време, во поголемиот број случаи тоа е повеќе од доволно време за да може авионот да се спушти на пониска висина.
Дали навистина луѓе имаат секс за време на лет?
Да, за жал. Ако мислите дека никој не забележал дека сте се шмугнале двајца во малото авионско веце, се лажете. Без разлика дали сте на лет од 40 минути или на прекуокеански лет, некој од патниците или екипажот на лет сигурно забележал. Посебно екипажот на лет!
