Капитенската лента на Кристијано Роналдо, која ја фрли на теренот кога го напушти фудбалскиот натпревар меѓу Србија и Португалија во Белград затоа што не му беше признат гол, беше продадена на добротворна аукција за 63.560 евра.
Средствата од аукцијата се наменети за лекување на шестмесечниот Гаврило Ѓорѓевиќ кој боледува од спинална мускулна атрофија.
Лентата на Роналдо од тревата на белградска Маракана ја зел младиот пожарникар Ѓорѓе Вукичевиќ и ја донираше со намера да ја искористи за да му помогне на малиот Гаврило, преку аукција на специјализираниот портал Limundo. По тридневно наддавање, лентата ја купи белградската спортска обложувалница Mozzart.
Португалскиот репрезентативец ја тргна капитенската лента и ја фрли на тревата додека го напушташе теренот во судиското надополнување на квалификацискиот натпревар Србија-Португалија за СП Катар 2022. Тој претходно доби жолт картон порди протестирањето против одлуката на судијата Дани Макели да не му го признае голот.
Хуманитарната организација „Заедно за живот“ има за цел да собере 2,5 милиони евра, колку што се потребни за лекување на Гаврило. На социјалните мрежи во Србија на почетокот на аукцијата се појави покана до Кристијано Роналдо да си ја купи капитенската лента и на тој начин да му помогне во лекувањето на болното момче, но ПР тимот на Роналдо не одговори на тие повици.