Бирањето на совршената венчаница е тешка одлука за идните невести. Оваа 93-годишна невеста има четири пати потежок избор.
Силвија Мартин во јули ќе се венча со нејзиниот долгогодишен пријател Френк Рејмонд (88), но не може да се одлучи што да носи на венчавката.
Таа избрала четири фустани во бутикот Birdsnest, но не можела да се одлучи за еден. Вработените во бутикот решиле да ѝ помогнат и ја фотографирале Силвија во четирите комбинации.
Потоа побарале помош од корисниците на Facebook и добиле повеќе реакции отколку што очекувале.
Некои корисници имаат фаворити, а некои предлагаат да ги земе сите четири и да ги носи во разни прилики: еден за во матично, еден за на приемот, еден за дома и еден за на медениот месец.
За кратко време илјадници луѓе се вклучиле во дискусијата и ја дознале приказната на Силвија.
Френк ја запросувал неколку пати, но таа не сакала да го смени презимето бидејќи сметала дека тоа ќе биде непочитување кон нејзиниот покоен сопруг.
Пред една година Силвија се разболела и се преселила од Аделаида во Канбера за да биде поблиску до семејството. Тогаш Френк си помислил дека нема веќе да има шанса да биде со неа.
Откако оздравела, повторно го контактирала стариот пријател и го замолила и тој да се пресели во Канбера за да бидат заедно.
Френк се преселил по неколку месеци и повторно ја запросил. Откако Силвија дознала дека нема да мора да го смени презимето ако се омажи, го прифатила предлогот за брак.
Останува уште да се види кој фустан ќе добие најмногу гласови.