Принцот Петар Караѓорѓевиќ објави дека го потпишал решението за абдицирање, со кое се откажува од сите права што му припаѓаат врз основа на неговото првородство и ги пренесува на следниот по возраст, неговиот брат Филип.
Принцот Петар, најстариот син на принцот Александар Караѓорѓевиќ и внук на кралот Петар II Караѓорѓевиќ, ја потпишал одлуката за абдикација, рече тој во изјавата денеска во палатата Свети Андреј во Севиља, во присуство на сведоци, како што нагласува, свесен дека со овој чин се откажува од сите права за себе и за сите негови потомци кои се родени или ќе се родат во брачна или вонбрачна врска.
„Не се откажувам од правата што произлегуваат од правото на наследување на името, членството на Кралската куќа, титулата принц и сите други права и обврски кои законот и традицијата му ги даваат и наметнуваат на еден член на семејството“, изјави принцот Петар, чија одлука да абдицира стапи во сила по потпишувањето.
На потпишувањето присуствуваа неговата мајка принцезата Марија да Глорија од Орлеан и Бреганца и Војвотка од Сегорба, неговиот очув Игнасио, Војводата од Сегорба, јеромонахот Микел Ортега Модест, старешина на црквата Свети Архангел Михаил во Палма на островот Мајорка, престолонаследникот Филип, принцезата Даница, сестра Соул, грофицата од Ампуријас, Љубодраг Грујиќ, член на крунскиот совет, канцелар на редот и гласник на Домот на Караѓорѓевиќ и Никола Станковиќ, шеф на канцеларијата на престолонаследникот.
За својата непоколеблива одлука, како што истакнува, официјално го известил својот татко и старешината на Кралската куќа, принцот Александар и српскиот патријарх Порфириј.
Тој смета дека во интерес на династијата е принцот наследник да живее со семејството во Србија меѓу својот народ.
Во таа смисла, тој истакнува дека неговиот брат, принцот Филип, својот живот и животот на семејството го врзал за Србија, каде по девет децении е роден првиот машки член на династијата Караѓорѓевиќ, наследникот на принцот Филип, идниот крал Стефан.
Принцот Петар наведува дека животот го продолжува во Севиља, како и досега.
Династијата Караѓоршевиќ беше на чело на Кралството Југославија официјално до 29 ноември 1945 година кога Јосип Броз Тито ја направи државата социјалистичка република. Претходно беа во егзил по окупацијата на земјата во 1941 година.
