Осомничениот за нападот во Манчестер, Салман Абеди, уште лани се заканил дека сака да се одмазди поради убиството на неговиот пријател кого Англичани го нападнале во истиот град, изјавил извор близок до неговото семејство.
Пријателот на Абеди, исто така со либиско потекло, починал во мај минатата година откако бил прободен со нож од страна на британски млади момчиња во Манчестер. На напаѓачите сѐ уште им се суди.
„Инцидентот предизвика гнев кај младите Либијци во Манчестер, а особено кај Салман, кој јасно изрази желба за одмазда“ додал анонимниот извор.
„Успеавме да ги смириме младите луѓе во населбите, кои веруваа дека се цел на напади поради тоа што се муслимани. Но најверојатно Салман не го заборавил инцидентот“.
Неименуваниот извор нагласил дека лично разговарал со Салман и се обидел да го убеди дека станува збор за кривично дело.
Во бомбашкиот напад загинаа 22 луѓе, од кои повеќето млади обожаватели кои присуствуваа на концертот на Аријана Гранде.