Музика

Адел официјално поднесе барање за развод

13. септември 2019 - 12:41 | А.С.

Британската пејачка Адел официјално поднесе документи за развод од сопругот Симон Конецки. Нивниот портпарол рече дека двојката спогодбено ќе се раздели и дека двајцата ќе продолжат заедно да се грижат за нивниот син.

Адел во април преку нејзиниот портпарол соопшти дека се разделила од Конецки, но извори блиски до двојката велат дека таа го напуштила уште лани летото.

Двајцата не потпишале предбрачен договор пред да се венчаат во 2016 година.

Тоа значи дека во разводот Конецки би можел да земе половина од нејзиното богатство стекнато додека беа заедно, а „тежи“ 150 милиони фунти.

Адел е една од најпродаваните музички ѕвезди во светот, но исто така и една од најтаинствените кога станува збор за споделување на детали од нејзиниот приватен живот со јавноста.

Во март направи големо изненадување кога заедно со нејзината пријателка, актерката Џенифер Лоренс, се појавија во неколку геј ноќни клубови каде пееја и се забавуваа заедно со другите гости. Наводно, тоа била забава за прославување на разводот.

Извор близок до пејачката за Mirror изјави дека Адел неколку месеци претходно почнала да им кажува на блиските роднини и пријатели дека се разделила со Симон.

Причината за разделбата наводно е фактот дека двајцата се премногу зафатени и поминуваат многу време раздвоени.

Симон наводно не сака да се појавува на свечени настани и да биде под лупа на медиумите, а Адел по неколку години се враќа во студио што значи дека подготвува нов албум и ѝ следи период на интензивно појавување во јавноста.

Адел (30) во февруари ја продала нивната заедничка куќа во Велика Британија вредна 3 милиони долари, а во јануари ја префрлила сопственоста на куќата во Лос Анџелес на Симон.

Адел се омажи за Конецки по пет години врска, во 2016 година. Двојката во 2012 година го доби синот Анџело.

Двајцата се венчаа тајно, а Адел прв пат јавно проговори за бракот во говорот кога примаше Греми награда во 2017 година и му се заблагодари на „сопругот“.

Светски познатата пејачка ги има објавено бестселер албумите 19, 21 and 25. Нејзиниот прв албум објавен во 2008 година, на кој беа хитовите „Chasing Pavements“ и „Hometown Glory“, се искачи на прво место на албумската топ листа во Велика Британија

По него следеше планетарно популарниот албум 21 што се најде на првото место на албумските топ листи во 30 земји, вклучувајќи ги САД и Велика Британија.

Нејзиниот трет албум 25 се продаде во рекордни 800.000 примероци во првата недела од објавувањето и стана нејпродаван албум во 2015 година.

Коментирај