Британската музичарка Адел, која објави дека новиот, четврти по ред албум, по шестгодишна пауза, ќе излезе на 19 ноември под наслов „30“, зборуваше за емоциите што ги носи овој албум, за разводот, за искреноста и за искупувањето.
„Мислам дека ова е албум за самоуништувањето, искреноста и искупувањето. Но, подготвена сум да ги слушнам реакциите на луѓето за мојата приказна. Сакам со овој албум да му објаснам на син ми, кога ќе има дваесет или триесет години, зошто самоволно одлучив да му го уништам целиот живот за мојата среќа. Понекогаш е многу несреќен бидејќи јас и татко му сме разведени. И тоа е жива рана за мене и не знам дали некогаш ќе успее да се опорави од тоа“, изјави Адел за британското издание на Vogue, по повод нејзиниот долгоочекуван нов албум.
На крајот на април 2019 година, беше објавена веста дека Адел и нејзиниот сопруг Сајмон Конецки се разведуваат. За време на бракот го добија синот Ејнџел, кој се роди на 12 октомври 2012 година.
Пејачката призна дека нејзината одлука да се разведе била тешка, но дека имала пријатели кои биле со неа и ја држеле за рака навечер додека плачела неутешно.
На својот Instagram, пејачката малку подлабоко го објасни хаосот во кој се наоѓала последниве години и сите емоции што се вткаени во овој албум.
„Не сум ни блиску до местото каде што мислев дека ќе бидам кога го започнав сето ова пред три години. Се потпирам на рутина и конзистентност за да се чувствувам безбедно, и се најдов, свесно, па дури и доброволно, во целосен хаос и внатрешни превирања... Научив многу вистини попатно, симнав некои слоеви, но исто така се вовлеков во некои сосема поинакви. Сепак, успеав повторно да го најдам своето чувство и дури можам да кажам дека никогаш во животот не сум се чувствувала посмирено. И затоа, подготвена сум конечно да го издадам овој албум во јавност... Со малку болка, успеав да го изградам мојот дом и моето срце и овој албум е за тоа. Домот е таму каде што е срцето“, напиша Адел, меѓу другото, во својата долга порака до верните обожаватели.