Ако си замине од загрепски Динамо тоа би го направил единствено за да игра во едно од петте најдобри првенства на светот, а сите тие се во Европа.
Македонскиот репрезентативец Аријан Адеми одби богата понуда од клубот Ал Наср од Обединетите Арапски Емирати. Понуда која нему лично ќе му донесеше огромна плата, а со трансферот голем ќар ќе оствареше и Динамо.
Но, на Адеми не му се игра во ОАЕ. На 28 години има уште многу што да покаже, а како што вели тренерот Ненад Бјелица, доколку Адеми си замине сака тоа да го покаже во Премиер лигата, Серија А, Бундеслигата, Ла Лига или пак во Лиг 1.
„Да, синоќа се заврте приказната околу заминувањето на Аријан Адеми, тој доби чудесна понуда за голема заработка, а во тој случај добро ќе поминеше и клубот. На нашиот играч, долгогодишниот капитен, не сакавме да му правиме никакви проблеми. Адеми има 28 години и заслужува сам да одлучува за тоа каква ќе биде неговата иднина. Јас како тренер во такви ситуации ги оставам играчите сами да одлучат, а се чини дека Аријан навистина ќе нѐ напушти“, рече Бјелица за веднаш потоа да додаде: „Еве, токму сега ми ѕвони Аријан, морам да одговорам. Ќе ми јавам што завршам со него“.
За 5-6 минути Бјелица си го остварил ветувањето, се јавил назад кај новинарот на дневниот хрватски весник 24sata.
„Сега разговаравме, Адеми одлучи да остане во Динамо. Вели дека не сака да го напушти Динамо, поготово доколку не се работи за понуда од некоја од најдобрите пет лиги. Нормално дека ќе ја почитуваме неговата одлука, тој и натаму останува важен играч на Динамо“.
Коментарите на навивачите на „Модрите“ ширум интернетот се со големо воодушевување за изборот на македонскиот репрезентативец. Тој е веќе легенда на клубот, ги одби парите на шеците за да остане во Динамо и да го чека трансферот кој можеби никогаш нема да се случи. Но, барем ќе биде среќен во Динамо, во Загреб.
