Аријан Адеми стави крај на шпекулациите дека заминува во репрезентативна пензија откако јавно потврди дека и натаму ќе ѝ биде на располагање на македонската репрезентација.
Откако не одигра ниту еден натпревар од Лигата на нации минатата година, а не беше дел ниту од ноемвриските пријателски, чаршиските муабети велеа дека моторот во средниот ред на загрепски Динамо одлучил да не игра повеќе за Македонија Шпекулации одеа дотаму што се зборуваше и дека заедно со клупскиот соиграч Стефан Ристовски го бојкотирале селекторот Благоја Милевски. Тоа неодамна го дематираше и самиот Милевски.
Сега се јави и Адеми, кој потврди дека не само што нема никаков проблем со селекторот, туку и дека и ќе продолжи да игра за репрезентацијата во квалификациите за ЕУРО 2024, кои почнуваат во март. Нормално, ако е здрав.
„Одлучив да продолжам да играм за репрезентацијата. Сакам, можам и ќе играм. Зборував и со селекторот, тој сака да бидам таму, и ќе бидам“, изјави Адеми во интервју за хрватски Germanijak.
„Тешко ми е да се збогувам, бидејќи групата на луѓе таму е одлична, играме за нашата земја, се пласиравме на последното Европско првенство и сакаме да го повториме тоа. Иако сме во многу тешка група“, додаде.
Освен аутсајдерот Малта, против кого Македонија ги отвора квалификациите на 23 март во Скопје, противници во групата се великаните Италија и Англија, како и секогаш незгодната и солидна Украина, три репрезентации кои имаат иста цел - пласман на ЕУРО 2024.
„Свесни сме дека нема да биде лесно, но веќе ја победивме Германија, па Италија, и нема од кого да се плашиме. Знам дека Италијанците ќе бидат особено мотивирани против нас, бидејќи ги исфрливме од Мундијалот, но и ние ќе бидеме многу мотивирани и загреани, веруваме дека можеме да оствариме уште една голема победа“, заврши Адеми отстранувајќи ги сите дилеми околу репрезентативниот статус.
Адеми е македонски репрезентативец од октомври 2014, а досега собра 28 настапи на кои постигна и 4 голови.