Традиционалниот НБА Ол-стар натпревар ќе се одржи од 14 до 16 февруари во Сан Франциско. Веќе се познати составите на Истокот и Западот, а исто така е познато дека играчот кој доби најмногу гласови на Истокот, Јанис Адетокунбо, ќе го пропушти Ол-стар викендот.
Како што пренесуваат американските медиуми, причината е повреда на левата потколеница. Ѕвездата на Милвоки Бакс поради ова е на клупата цела недела, додека последните лекарски извештаи говорат дека Гркот нема да се опорави за Ол-стар натпреварот.
Како што додава Шамс Шаранија, Јанис сѐ уште ги чувствува последиците од повредата. Има благи болки во потколеницата, па раководството и стручниот штаб на Бакс не сакаат нивниот најдобар играч да ризикува со посериозна повреда.
Сезонава Јанис има просек од 32 поена и 12 скока, а сѐ уште не е познато кој ќе го замени за време на спектаклот во Сан Франциско.
За потсетување, Јанис Адетокунбо требаше да игра во тимот избран од Шекил О’Нил со Никола Јокиќ, Шеј Гиџс-Александер, Виктор Вембанјама, Паскал Сјакам, Алеперен Шенѓун, Карл-Ентони Таунс и Донован Мичел.
