Германската компанија за спортска опрема Adidas го изгуби случајот пред Судот во Луксембург, во кој Канцеларијата на ЕУ за заштита на интелектуалната сопственост ја оспори автентичноста и специфичноста на логото на компанијата.
Компанијата не успеа да докаже дека „логото под кое Adidas ги продава своите производи на територијата на Европската унија нема никакви специфични карактеристики кои го прават автентично“.
Логото со три ленти беше дизајнирано од основачот на компанијата, Ади Даслер, и за првпат се појави на фудбалска копачка на 18 август 1949 година. Судот пресуди дека иако логото датира многу одамна, не е доволно карактеристично за да бидат идентификувани производите кои ги продава овој германски бренд. Одлуката на судот беше донесена во долгогодишниот спор помеѓу Adidas и белгиската компанија Shoe Branding Europe.
Во 2014 година, на Adidas му беше гарантирана трговска марка за „три паралелни ленти со идентична широчина, кои се аплицирани на производот во било која насока“ на облека, патики и капи. Но, во 2016 година Shoe Branding Europe испрати жалба до Канцеларијата на ЕУ за интелектуална сопственост поради тоа што сметаа дека „не постои доволен доказ дека купувачите можат лесно да препознаат дека се работи за производ на Adidas со самото гледање на три ленти на парче облека“.
„Оваа пресуда е лимитирана на посебна примена на логото со трите ленти и не ја таргетира целосната употреба и заштита на брендот Adidas во различни форми на територијата на Европа“, стои во изјавата на Adidas.
Ова не е прв случај во кој Adidas не успева да обезбеди доволен доказ дека нивното лого е доволно автентично, бидејќи во 2003 го изгуби случајот против Wrigley’s – компанија која користи две паралелни ленти за дистинкција на нејзините производи.
