Производителот на спортска опрема Adidas соопшти синоќа дека 30 проценти од сите нови вработувања во САД ќе бидат црнци или Латиноамериканци, во време кога земјата ја тресат протести против расизам што одекнаа ширум светот.
„Настаните во изминатите две недели предизвикаа сите да размислиме за тоа што можеме да сториме за да се спротивставиме на културните и системските сили кои го одржуваат расизмот“, наведе извршниот директор на Adidas, Каспер Рорстест.
Спортскиот гигант ја објави новата мерка, меѓу неколку други, истиот ден кога беше и погребот на Џорџ Флојд, црнец убиен при приведување од американската полиција од белец полицаец. Вработените во Adidas неодамна ја критикуваа компанијата дека не сторила доволно за борба против расната дискриминација.
Германската групација исто така соопшти дека во текот на следните четири години, ќе зголеми на 20 милиони американски долари финансирањето за своите програми што ги поддржуваат Афроамериканците – програма за кошарка за недоволно развиени заедници, финансирање за училиште за дизајн на Adidas и програма за поддршка на црната заедница преку спорт.
Adidas исто така вети дека ќе обезбеди 50 стипендии за своите црни вработени секоја година за следните пет години.