Аеродромот на Малдивските Острови е како авионите да се нурнуваат во океанот - истовремено застрашувачко и преубаво искуство.
Меѓународниот аеродром Мале е главниот аеродром на Малдивите и воедно единствен кој нуди меѓународни летови до оваа островска држава во Јужна Азија.
Сместен е на островчето Хулхуле, во близина на главниот остров Мале по кој аеродромот е именуван. Порано го носел името на првиот малдивски претседател Ибрахим Насир, а денес го нарекуваат и Меѓународен аеродром „Велана“.
На овој остров во Индискиот Океан првиот аеродром бил отворен во октомври 1960 година. Тогаш располагал со челична писта со димензии 23х914 метри. Новата писта од асфалт била пуштена во употреба во април 1966 година благодарение на локалните волонтери кои помогнале во изградбата.
Со текот на годините и со порастот на туристичкиот интерес за оваа рајска дестинација, аеродромот бил реновиран и му била изградена додатна инфраструктура. Островото-аеродром денес содржи и метеролошка станица, како и хотелот „Хулхуле“ кој е наменет за патниците кои транзитираат. Исто така, дел од аеродромот е и хидродром кој располага со четири писти за хидроавиони.
И додека едни уживаат во спектакуларниот поглед додека слетуваат и полетуваат од овој аеродром, други се преплашени поради самиот факт што пистата широка 45 и долга 3.200 метри се наоѓа на надморска височина од само два метра, па изгледа како авионите при слетување да нурнуваат во Индискиот Океан.