Адолф Хитлер доаѓа на власт преку демократски избори. Ова не е лекција по историја туку тековни случувања во Намибија, поранешна германска колонија во Југозападна Африка.
Именуван во чест на поранешниот германски лидер, Уунона Адолф Хитлер освои мнозинство од гласовите и освои место во советот на регионот Ошана.
Во интервју за германски Bild, намибискиот Хитлер вели дека за разлика од неговиот злогласен имењак, тој нема амбиции да завладее со светот.
„Татко ми ми го дал името по тој човек. Веројатно нема поим за што Адолф Хитлер се борел. Најчесто во употреба користам Адолф Уунона. Сега е веќе доцна за да си го променам името“, вели тој.
Намибија била колонија на Германија од 1884 до 1919 година, време за кое Германците извршиле масовни убиства, а локалното бунтовно население било ставано и во концентрациони логори. Денес самата Германија своите дејствија во Намибија ги смета за геноцид. Откако Германците ја загубиле Првата светска војна, биле приморани Намибија да им ја отстапат на Британците, кои пак ја дале под контрола на Јужна Африка од каде во 1990 Намибија се отцепува како независна.