Фудбал

Агентот на Озил ги нападна Нојер, Крос и Милер: Имаат заговор против Месут

18. септември 2018 - 18:10 | К.З.

Месут Озил по крајот на Светското првенство во Русија објави дека се пензионира од германската репрезентација поради лошиот однос на раководството и играчите према него и натурализираните Германци како него.

Неговиот агент, Еркут Согун, во последната изјава ги нападна поранешните колеги на Озил од репрезентацијата: Мануел Нојер, Тони Крос и Томас Милер, кои отворено кажаа дека не се согласуваат со обвинувањата за расизам и национализам.

Според Согун, фудбалерите се наивни или пак коваат завера против Месут Озил, па поради тоа не сакаат да признаат дека постојат двојни стандарди во репрезентацијата на Германија. Германската јавност застана против Озил откако тој се сретна со турскиот претседател Ердоган, а истото расположение владееше во репрезентацијата, што го натера Озил да каже дека кон него федерацијата се однесува поинаку бидејќи е натурализиран, а не Германец со потекло.

„Мануел Нојер индиректно го обвини Месут дека не го носел германскиот дрес со гордост, а тоа е неприфатливо. Милер не разбра зошто беше отворена дискусија, додека Крос го нарече неговиот потег ‘глупост’. Постојат само две објаснувања: или тие се наивни или пак навистина имаат завера против Озил“, изјави Еркут Согун.

Милер рече дека германските фудбалери не го доживеале тоа толку страшно колку што го доживеаја медиумите, но потенцираше дека во репрезентацијата не постои расизам или пак национализам.

„Зарем треба да му кажеме на Месут дека не може да се сретне со претседателот во тој момент, туку мора да почека два месеци?“, изјави Согун по коментарите на медиумите дека Озил ја остварил средбата со Ердоган во момент кога односите помеѓу Германија и Турција се тензични.

Агентот на Озил истакна дека не е негова работа да се грижи за постапките на неговиот клиент. Тој вели дека германскиот фудбалер е доволно возрасен за да направи одлука со чиста свест, посебно ако се работи за средба со државник со кого лично се познава.

Коментирај