Рома, Баерн, Наполи и Челси досега се споменуваа како клубови кои би можеле да го ангажираат незадоволниот Кристијано Роналдо, а во меѓувреме мадридски AS пласираше бомба за евентуален трансфер на Португалецот во Барселона.
Имено, претседателот на Барселона, Жоан Лапорта и менаџерот на Роналдо, Жорже Мендеш наводно се сретнале на вечера синоќа, а во текот на разговорот неколку пати се споменувало името на Кристијано.
Шпанскиот весник пишува дека Барселона го сакала Роналдо минатото лето кога тој од Јувентус се пресели во Манчестер Јунајтед за 15 милиони евра, но тогаш Каталонците не можеле да му го исполнат барањето за огромна плата.
Сега ситуацијата е подобрена бидејќи касата е дополнета со продажба на дел од правата за користење на брендот и преносите на натпреварите, па клубот би можел да ги исполни очекувањата за заработка на Роналдо.
Останува само прашањето дали Португалецот е подготвен да им забие нож во грб на навивачите на Реал Мадрид само за да игра во Лигата на шампионите, кои ги веселеше девет години и кои го сметаат за икона на клубот.
Минатата сезона Роналдо постигна 18 гола на 30 натпревари во Премиерлигата и 6 во 7 натпревари во Лигата на шампионите и речиси сигурно може да одигра барем уште еден натпреварувачки циклус на високо ниво.
Лапорта и Мендеш, како што тврди AS, разговарале токму за тоа, но и за други играчи застапувани од славниот менаџер кои се потенцијални мети на Барселона.
Инаку, договорот на португалскиот фудбалер со клубот од „Олд Трафорд“ е до 30 јуни 2023 година.