Српската авиокомпанија му забранила на 11-годишно момче да се качи во авион на белградскиот аеродром „Никола Тесла“. Семејството на детето најави тужба.
Од „Air Serbia“ велат дека жалаат за непријатностите низ кои поминало семејството пред три дена, но наведуваат дека одлуката да не му се дозволи на младиот патник да се качи во авионот била донесена бидејќи станал многу вознемирен и почнал да се однесува сѐ поагресивно додека чекал во редот за пријавување за летот.
„Одредени патници, кои исто така чекаа во редот, изразија загриженост за нашиот персонал на кој приоритет им се безбедноста и добросостојбата на сите на летот. Согласно процедурата, секој вознемирен патник мора да биде прегледан од лекар на аеродромот за да се утврди дали е во состојба да патува. По проценката на лекарот, го известивме семејството дека нивното дете, за жал, нема да може да патува и им ја објаснувме постапката за промена на датумот на летање. Како авиокомпанија ние постапиваме еднакво и непристрасно кон сите наши гости“, стои во одговорот на „Air Serbia“ за „Новости“.
Таткото на детето, познатиот српски историчар Чедомир Антиќ, најави дека ќе поднесе тужба против аеродромот и авиокомпанијата и дека ќе ги преземе сите неопходни мерки предвидени со законот откако на неговиот син не му беше дозволено да се кажи на летот „за да не ги вознемири другите патници“.
Институциите и големите компании мора да имаат јасни и сериозни процедури кога се во прашање децата и лицата со аутизам, но тоа не е случај во Србија, вели претседателката на Сојузот на здруженија во Србија за помош на лицата со аутизам, Весна Петровиќ.
Таа предупредува дека има многу забелешки од родителите на деца со аутизам што јасно укажуваат дека во Србија не постои чувствителност за овој проблем, но дека мора да постојат процедури.
Петровиќ укажува дека авиокомпаниите во САД со причина имаат посебни правила во врска со постапувањето со деца со аутизам. Прашање е дали постои какво била процедура на белградскиот аеродром, вели таа и додава дека нема никакво сомнение дека вработените на аеродромот во овој случај ги повредиле правата на детето.
„и јас сум мајка на дете со аутизам и ние како семејство имаме летано со авион и се случува детето да се вознемири поради гужвата, но не е забележан ниту еден случај во светот лице со аутизам да повреди некого. Ако патниците навистина реагирале и се побуниле, тоа само дополнително ме растажува бидејќи покажува дека општеството нема чувствителност за овој проблем. Меѓутоа, институциите и компаниите мора да имаат процедури со кои ќе ги заштитат правата на децата со аутизам. Во спротивно сѐ што ни останува е да седиме дома“, вели Петровиќ.
