Раководството на Академија Пандев не ја прифати оставката која по серијата лоши резултати вчера ја понуди тренерот Ѓорге Стојчев.
– На денешниот состанок на Управниот Одбор на клубот беше разгледана понудената оставка од страна на шефот на стручниот штаб на сениорскиот тим, Ѓорге Стојчев и сакаме да ја информираме јавноста дека истата не е прифатена, соопшти попладнево Академија Пандев.
Стојчев седна на клупата на прволигашот од Струмица во јануари годинава, а понуди оставка по резултатската криза на последните два натпревари и освоениот само бод од дуелите со Скопје и Борец
– Управниот Одбор, сите вработени, како и сите кои на каков било начин се поврзани со клубот целосно ја даваат поддршката на тренерот Ѓорге Стојчев, а убедени сме дека резултатската криза ќе се надмине веќе во наредните натпревари. Решението за назначување на Стојчев за тренер на сениорскиот тим не е случајно и го сметаме за најважна алка во градењето на тимот во иднина, се наведува во клупското соопштение.