Струмичкиот прволигаш се пофали дека склучил договор со регионалната ТВ куќа Sport Klub за емитување на домашните првенствени и куп натпревари.
Фудбалскиот клуб чиј основач и газда е прославениот Горан Пандев го направи првиот чекор кон медиумска промоција кој за македонскиот клупски фудбал делува како квантен скок. Струмичани успеаја упсешно да ги завршат преговорите со балканскиот спортски ТВ гигант Sport Klub кому ги продадоа правата за емитување на сите нивни домашни натпревари.
Како што соопшти клубот, договорот е веќе потпишан и важи за домашните куп и првенстевни натпревари за наредните три сезони, почнувајќи од тековната 2021/22 сезона и наредните 2022/23 и 2023/24.
Ова е од огромно значење за македонскиот фудбал затоа што прв пат се случува вакво нешто. Досега ФФМ се договарала со домашни телевизии за пренесување на натпреварите од 1.МФЛ, а лани имаше договор со ArenaSport со тоа што дел од натпреварите одеа и на МРТ, но сезонава не падна договор откако шампионот Шкендија и токму Академија Пандев не ги прифатија понудените финансиски услови од ArenaSport. Очигледно струмичани биле способни самите да се изборат за подобри финансиски услови.
Викендов Академија Пандев му гостува на Пелистер во Битола, така да за прв пренос ќе почекаме до 26 овој месец кога дома го пречекуваат ривалот за титула, чаирски Шкупи.
