ЗНМ потсетува дека известувањето од денешниот погреб мора да биде во согласност со претходно утврдениот протокол и со основните принципи на професионалната етика.
Оттаму потсетуваат дека објавувањето на фотографии и видеа со гробни места, блиски членови на семејствата и приватни моменти претставува директно кршење на препораките за етичко известување и нарушување на достоинството на засегнатите лица.
„Ги повикуваме оние неколку медиумски работници и редакции кои отстапуваат од протоколот, да покажат почит и одговорност, да не објавуваат содржини што можат да предизвикаат дополнителна болка и да се придржуваат кон стандардите на етичко новинарство. Новинарството е во служба на јавниот интерес, но никогаш на сметка на човечкото достоинство“, апелираат од ЗНМ.
Во врска со новинарските екипи од странство и регионот кои веќе објавија вакви содржини од погребот во Кочани, од ЗНМ велат дека веќе се контактирани, а алармирана е и Европската федерација на новинари директно да реагира и да им укаже на сите странски екипи да се придржуваат до протоколот.
