Албанија ќе го блокира пристапот до TikTok на една година почнувајќи од утре, објавија албанските медиуми, повикувајќи се на Агенцијата за електронски и поштенски комуникации (AKEP).
Премиерот Еди Рама во декември најави дека ќе го забрани TikTok, но не кажа кога забраната ќе стапи на сила. TikTok е во сопственост на кинеската компанија ByteDance.
Рама објасни дека одлуката е донесена затоа што TikTok е опасност за децата и младите. Дискусиите за потенцијалните штетни ефекти на TikTok започнаа во Албанија, откако 14-годишно момче беше избодено до смрт кон крајот на минатата година.
Двете групи млади вклучени во инцидентот се антагонизирале меѓусебно на TikTok и договориле тепачка што заврши со убиство.
