Она кое македонските фудбалски љубители веќе триесетина години го очекуваат конечно доаѓа кај нас и од почетокот на наредниот месец ќе биде во продажба.
Албумот за ЕУРО 2020 на италијанскиот производител Panini во продажба ширум Републикава ќе биде пуштен в понеделник, 5 април. Нам тоа и тоа како нѐ засега бидејќи во него се и Пандев, Елмас, Адеми, Несторовски, Барди, Ристовски и останатите.
Ова го објави „Панини - Македонија“, официјалниот застапник на албумите на Panini во Македонија.
„Наближува времето за собирање и за испишување на фудбалската историја на Македонија.
Официјалниот албум со сликички на Panini - EURO 2020,
ВО ПРОДАЖБА ОД 5-ти АПРИЛ!!!“, објави дистрибутерот.
Panini, со седиште во Модена, Италија, е формиран во 1961 година од браќата Џузепе, Бенито, Умберто и Франко Панини. Прво почнале со сликички од италијанската Серија А, а од 1970 и Мундијалот во Мексико одат и на светско ниво.
Репрезентацијата на Македонија за прв пат учествува на едно големо натпреварување и со тоа за прв пат ќе ја има и во ваков албум на Panini.