Шампионската трка во Италија повторно стана неизвесна, откако Јувентус освои само еден бод во Ферари. „Давеникот“ СПАЛ успеа да ги спречи нападите на гостите и да не прими ниту еден гол, па натпреварот заврши 0:0, што им оди во прилог на фудбалерите на Наполи кои од 20:45 вечерва играат на свој терен против 13-пласираната Џенова.
Јувентус имаат солидна предност од пет бода, но ако Наполи победи, пак ќе „му дише во врат“ на актуелниот шампион.
„Не сум ни лут, ни разочаран“, изјави тренерот Масимилијано Алегри по натпреварот.
„СПАЛ добро се бореше, заслужува пофалби... Доброто е што не примивме гол, а моментално имаме солидна предност од пет бода“, потсети Алегри и се обиде да ја образложи играта на неговиот тим.
„Кога немаш доволно ментална енергија, противникот ќе ја освои секоја ‘ничија топка’. Токму тоа и се случи. СПАЛ беше поагресивен, за што сведочат и тие 29 фаул потези. Константно вршеа притисок и успеаја да не ни дозволат да здивнеме. Човечки е понекогаш да ти снема енергија кога си прв на табелата, во четвртфинале во Лига на шампиони и во финале од Купот... многумина очекуваа дека ќе кикснеме против Лацио, но еве, тоа се случи сега. Се случува... најважно е добро да се одмориме, бидејќи играме на три фронта и потребен ни е секој играч.“
