Масимилијано Алегри откри дека пред две години одбил да седне на клупата на Реал Мадрид, клупа за која многумина сонуваат.
„Пред две години имав контакт со нив, но не излезе ништо бидејќи имав договор со Јуве. Причината зошто ги одбив е бидејќи имав цврста морална приврзаност кон клубот и навивачите“, Алектри откри зошто не сакал да замине во Реал во изјава дадена за Marca.
Тој си замина од Јувентус минатото лето и оттогаш е сѐ уште без ангажман. Реал го барал кога на неговата клупа седеа Жулен Лопетеги и Сантјаго Солари, чии ангажмани не се прославија па во март 2019 мадриѓаните повторно го ангажираа Зинедин Зидан.
„Тој посвети големо внимание во изнаоѓањето баланс во тим полн со класа играчи и огромен талент. Според мене, позиционирањето на Каземиту е тактички класа од потег на Зизу“, ја опишува тој работата на Зидан во Реал.
Засега нема намера да му се врати на фудбалот.
„Ги полнам батериите и уживам во времето поминато со моето семејство во мојот град Ливорно, каде се и моите стари пријатели. Не се грижам дали мојот нареден ангажман ќе биде во или надвор од Италија. Секако ќе биде клуб со кој ќе делам ист проект, односно ќе биде клуб со амбиции да се натпреварува и да победува“, завршува Алегри.