Алекс Консани e првата трансродова жена крунисана за Модел на годината

Американскиот модел Алекс Консани стана првата трансродова жена која ја освои титулата Модел на годината на Британските модни награди што се одржаа во Лондон.

21-годишната манекенка е препознатлива по карактеристичната бела коса и веѓи, а претходно се појавуваше на модните писти за брендови како Chanel, Stella McCartney и Victoria's Secret.

Во својот говор, Консани пред присутните во Ројал Алберт Хол рече дека нејзината победа означи голем чекор во светот на модата.

„Сега, повеќе од кога било, важно е да разговараме за тоа како можеме вистински да се поддржуваме и да се подигнеме меѓусебно во оваа индустрија, особено оние кои се чувствувале омаловажено“, рече таа.

Таа ја прими наградата од плус-сајз моделот Ешли Греам и ѕвездата од „Baby Reindeer“ Нава Мау, која исто така е трансродова жена.

Откако потпиша договор со IMG Models во 2019 година, агенција која ги застапува супермоделите како Клаудија Шифер, Хејли Бибер и Џиџи и Бела Хадид, Консани се прослави преку TikTok, каде што сега може да се пофали со речиси четири милиони следбеници.

Таа дебитираше на модната писта за брендот Tom Ford во 2021 година, а подоцна носеше ревии за врвни куќи како Alexander McQueen и Versace.

Консани и Валентина Сампајо испишаа историја во октомври со тоа што станаа првите трансродови модели кои се појавија на модната писта за Victoria's Secret Fashion Show.