Алексис Санчез, големото засилување за Манчестер Јунајтед во зимскиот трансфер период, за британските медиуми истакна дека дошол во најголемиот англиски клуб и дека со него сака да ги освои сите титули.
Чилеанецот на „Олд Трафорд“ пристигна во јануари во размената на играчи меѓу Јунајтед и Арсенал, во која во спротивен правец отиде Арменецот Хенрих Михтарјан.
Иако го сакаше и Манчестер Сити, моменталниот лидер на Премиер лигата, Санчез сепак го одбра Јунајтед.
„Уште од млади денови мислев дека Манчестер Јунајтед е најголемиот клуб во Англија. Ова не го зборувам затоа што сум овде, искрен сум и никогаш не лажам. Тоа е мое мислење. Постојат многу големи клубови, играв за Арсенал, и тој е еден од нив. Тоа е навистина голем клуб и имав чест да бидам таму. Но доаѓајќи овде, гледајќи го грбот, помислив дека Јунајтед мора да освои се, бидејќи ова е навистина огромен клуб“, вели Санчез.
Синиот тим од Манчестер оваа сезона и понатаму е во трка за дури четири титиули, така што шансите за титули на Санчез таму би биле навистина големи, сепак, тој се одлучи за црвениот дел од градот.
„Дојдов да победувам. Го напуштив Арсенал поради желба за напредок, бидејќи сакам да напредувам и учам како играч, но и да доживеам нов клуб. Манчестер Јунајтед е огромен клуб на глобалната сцена и дојдов овде за да ги освојам сите титули. Инаку нема причина да бидам овде“, заклучи Санчез.
Одличниот 29-годишен напаѓач својата слава ја стекна во Барселона, за потоа да се одлучи кариерата да ја продолжи во Арсенал.
За репрезентацијата на Чиле, со која два пати беше шампион на Јужна Америка, одигра дури 119 натпревари и постигна 39 погодоци.
