Македонскиот репрезентативец Исник Алими го чека долг пат од Кина откако се најде на списокот на селекторот Благоја Милевски за отворањето на мундијалските квалификации.
Алими зимава се пресели во кинескиот клуб Далјен Инбо, од градот Далјен во крајниот североисток на земјата кој се наоѓа на полуостров и гледа директно во Северна Кореја.
Откако дебитираше во 2023 година, Алими се наметна во средниот ред и беше еден од најдобрите играчи во ланскиот одличен поход во Лигата на нации.
Сега доаѓа за да игра за Македонија против Лихтенштајн (22 март, гости) и Велс (25 март, дома), но за разлика од досега, кога доаѓаше од романски Шепши, сега го чека долг пат, речиси од Северна Кореја.
„Благодарам за поддршката. Ме чека долг пат, можеби повеќе од 30 часа лет, но ќе бидам таму и ќе го дадам максимумот за Македонија на натпреварите против Лихтенштајн и Велс“, напиша Алими на Facebook.
Алими има 13 настапи во дресот со сонцето и 2 гола.
