Шпанскиот тенисер Карлос Алкарас се врати на местото каде прв пат го почувствува шармот на триумфот на еден Грен слем турнир, откако пред две години како 19-годишник го освои УС опен.
Во меѓувреме, Алкарас освои уште три Грен слемови, но свесен е дека сѐ уште е далеку од Новак Ѓоковиќ кој во Њујорк пристигна по 25-тата круна на еден од најголемите турнири.
„Да бидам целосно искрен, она што го прави Новак е чин на бруталност. Имам 21 година и веќе освоив 4 Грен слем титули, но се надевам дека нема да застанам тука. Многу луѓе се прашуваат што можам да направам во иднина ако веќе сум толку успешен, но 4 титули нема да значат ништо ако не продолжам да се развивам. Моја задача е да продолжам да растам и да се подобрувам бидејќи мојата цел е да победувам што е можно повеќе. Тоа го правеше Ѓоковиќ во текот на неговата кариера, секогаш сакаше да се подобрува кога играше на овие турнири, секогаш сакаше да ја покаже најдобрата верзија од себе. Успеа во тоа и затоа многу луѓе му се восхитуваат. Да се надеваме дека нема да продолжи да освојува титули. Ќе видиме, но се надевам дека јас ќе продолжам по овој пат“, рече Алкарас.
Поразот од Ѓоковиќ во финалето на Олимписките игри во Париз, како што признава, бил исклучително тежок момент за него.
„Тоа беше едно од најважните финалиња во мојата кариера, во мојот живот. Олимписките игри се на секои 4 години, па не знам дали ќе имам уште една шанса да го освојам златото. Сепак, дефинитивно ќе се борам за него на следните Игри во Лос Анџелес. Париз за мене беше тежок момент, го загубив златото во многу тесен меч во кој имав мои шанси, но тој ден пред себе имав навистина добар противник. Ѓоковиќ се бореше за истата цел и заслужи да победи, а јас неколку дена подоцна сфатив дека го освоив сребрениот медал, што исто така е големо достигнување“, изјави Алкарас.
Инаку, ловот на втор трофеј Шпанецот во Њујорк ќе го започне со дуелот од првото коло против Австралиецот Ли Ту, кој се игра во 1:00 часот вечерва по полноќ.
