Alphabet, матичната компанија на Google, го надмина технолошкиот гигант Apple и стана компанија со најмногу пари во кеш на светот.
Весникот Financial Times објави дека во вториот квартал од годинава Alphabet има 117 милијарди долари во ликвидни резерви, во споредба со 102 милијарди долари на Apple.
Иако е неспорно дека имањето пари во кеш е поволно, титулата „Крал на кешот“ не е баш причина за славење. Според Financial Times, ваквото покажување богатство може да го зголеми притисокот од акционерите кои би сакале да видат дека компанијата ги троши парите на откупување акции или делење дивиденди, а исто така ќе отвори пат за поголемо „чешлање“ од регулаторите кои покажуваат загриженост околу доминацијата на Google.
Google и неговата матична компанија добија парични казни од 8,2 милијарди евра од ЕУ во изминативе две години, по обвинение за „создавање монопол на пазарот“. Компаниите исто така се под лупа во САД.
Apple од своја страна одигра улога во „предавањето“ на титулата “Крал на кешот“: компанијата активно ја намалуваше својата ликвидност во изминативе години. Од 2017 година наваму, резервите на производителот на iPhone опадна за 61 милијарда долари од највисоката сума од 163 милијарди долари, со тоа што Apple ги искористи даночните реформи во САД за да ги врати резервите од странство и да ги исплати инвеститорите.
Во меѓувреме, кеш резервите на Alphabet се зголемија за 20 милијарди долари во истиот период, иако компанијата инвестираше во недвижен имот за канцеларии и центри за податоци.
Покрај тоа што ја има звучната титула „Крал на кешот“, Alphabet и понатаму е далеку од вистинската титула – Највредна компанија на светот.
Оваа титула моментално ја има Microsoft, технолошкиот гигант кој го надмина и Amazon со вредност од 1 илјада милијарди долари.
