Alpine го претстави концептот кој најавува сериски електричен хечбек за 2024 година.
Откако се појави во 1976 година, Renault 5 Alpine беше меѓу првите моќни хечбек модели кои беа пуштени во продажба дури и пред Golf GTI на Volkswagen. R5 ќе се „оживее“ како електричен автомобил, така што има смисла да се оживее и неговата верзија со високи перформанси. Затоа, Alpine го претстави концептот A290_β, кој ќе ја добие својата сериска верзија во 2024 година. Патниот модел ќе го произведува Renault Group во фабриката во малото француско гратче Дуе, а ќе се базира на електричната CMG-B платформа.
Со оглед на тоа што се работи за концепт, Alpine си ги зеде сите слободи. Се базира на концептот Renault 5 претставен на почетокот на 2021 година, но изгледа многу поекстремно за да се нагласи неговата спортска страна. Моќниот електричен автомобил ги доби познатите четири фарови, но и вертикалните задни светла преземени од тркачкиот модел А470. Обоен е во бело, во контраст со делумно црна хауба и покрив, додека долниот дел од каросеријата содржи ковани карбонски површини со сини детали.
Иако е долг само 4,05 метри, Alpine A290_β се наоѓа на големи бандажи од 20 инчи со необичен дизајн, кој има квадратен исечок во средината. Централните бандажи се украсени со француското знаме и се опремени со гуми развиени од Michelin. Оваа компанија ќе набавува и гуми за серискиот модел. Сѐ уште не е познато дали тој ќе изгледа подеднакво радикално.
Концептот е широк 1,85 метри и висок 1,48 метри, внатре има конфигурација од три седишта како онаа во McLaren F1 со возачкото седиште поставено централно и малку пред двете совозачки седишта. Контролната табла е дизајнирана во форма на стрела, направена според моделот на носот на болид од Формула 1. Минималистичкиот внатрешен дизајн вклучува волан инспириран од овогодинешниот тркачки автомобил LMP2 A470 и билидот A523 F1.
Alpine не откри детали за концептот, но се знае дека има систем за векторирање на вртежниот момент и задна суспензија со повеќе врски. Оваа суспензија е веќе потврдена за стандардниот Renault 5, па ќе биде дел и од спортската верзија. Концептот доби поцврсто прилагодување на суспензијата, три режими на возење (влажно, суво, полно) и Brembo сопирачки преземени од купето A110.
Следната година ќе пристигне сериската верзија на концептот Alpine A290_β, а потоа кросоверот GT-X Over и електричниот наследник на A110 развиен со Lotus.
