Златниот на Италија од 1982 и поранешен долгогодишен голгетер на Интер излезе со совети за играчкиот кадар на својот поранешен клуб.
Алесандро Алтобели стави точка на финалето од Мундијалот во 1982 во Шпанија кога Италија ја освои тогаш третата шампионска титула со 3:1 победувајќи ја Западна Германија на Румениге. Долги години настапуваше за Интер, од 1977 до 1988 кога одигра 466 натпревари на кои постигна 209 голови. Тој е еден од легендите на Серија А со 337 натпревари и 132 гола.
„Конте одлично го познава Видал. А и во Барса видовме што сѐ е кадарен да направи, веќе го познава нашето првенство и е топ за стилот на игра на Антонио. Може да игра и на позицијата на Ериксен и во средината. Дава голови и асистира, поливалентен е, со сигурност ќе биде од огромна корист“, вели Алтобели, очигледно презадоволен од ангажманот на Артуро Видал.
Повратници во Интер се Хрватот Иван Перишиќ и Белгиецот Раџа Наинголан кои се врати од позајмиците во Баерн и Каљари. Двајцата има аодлични сезони, а изненадување е тоа што Баварците одлучија да не го откупат Хрватот.
„Обавезно би ги задржал Перишиќ и Наинголан. Иван со Баерн освои Триплета, скоро секогаш играјќи од почеток. Точно е дека првата година во Интер Раџа беше помалку несмасен, но кога замина во Каљари покажа што може да направи. И тој може да игра на различни позиции. Со доаѓањето на Видал нема да има многу слободен простор, но играчи како него јас секогаш би ги чувал во состав“, советува сега 64-годишниот Алесандро.
Има свое мислење и за Кристијан Ериксен, Данецот кој дојде во Интер како големо засилување од Тотенхем, но не успеа да се наметне во системот на Антонио Конте.
„Дојде во јануари, потоа почна короната, па не успеа да се наметне. Логично е доколку пристигнат понуди Интер би направил добар потег доколку го продаде, бидејќи штом минатата сезона не успеа да се пробие во почетниот тим, оваа сезона уште помалку ќе има шанси да игра. Во Англија сум го видел како игра добро, но тука беше некако преморен, иако на последните натпревари покажа дека е добар играч“.