Предводникот на Вардар 1961 вели дека неговиот тим ќе атакува на пехарот од предсезонскиот традиционален турнир во Струга кој „Црвено-црните“ одамна не го освоиле.
„Презадоволен сум од работната атмосфера. Се работеше најмногу на физичка подготовка, а попладне и на тактика. Ни претстои уште доста за да дојдеме до посакуваното ниво за Лига на шампионите. Струга е прв турнир на кој ќе провериме сѐ што работевме изминатиот период. Тука мислам на она што го вежбавме. Сите играчи ќе добијат шанса. Вардар 1961 како европски првак оди со цел да го освои турнирот во Струга. Не можам да кажам дека резултатот не е важен, но во преден план е формата, вели тренерот на Вардар.
Вардар на турнирот во Струга се враќа по цели 6 години, а последен пат има триумфирано дури во 2007.
„Не одиме само да се проверуваме. Нормално е дека одиме да победиме. Бројките се само бројки. Вардар 1961 не учествувал одамна на турнирот. Сега сме повторно тука да играме и да се надигруваме, рече Стевче Алушовски за клупската официјална веб-страница.
Струшкиот турнир почнува денеска, но Вардар својот прв натпревар го има утре кога од 21:15 часот ќе се соочи со Охрид. Во петок игра со Еурофарм Пелистер 2, а во сабота со Бутел. Сите натпревари ќе одат во директен пренос на МРТ3.